skúli.annáll.is

AnnállGreinarPrédikanirSiglinganámskeiðSýnódurSöfnuður

« Dawkins og jaðarhóparnir · Heim · Hvað er málið? Rusl »

Andmæli við aðventuhugleiðingu

Skúli @ 12.49 10/12/06

Samræðan er málið í dag og sífellt fækkar þeim vígjum þar sem menn geta predikað yfir hópi án þess að eiga von á andmælum.

Þessu fékk ég að kynnast á dögunum er ég flutti stutta hugleiðingu yfir Kiwanismönnum hér í Keflavík. Hafði samið svolítið mærðarlega hugleiðingu en stemmningin í hópnum var svo góð að ég guggnaði á upplestrinum og sagði þeim í stað sögur úr ýmsum áttum, aðallega að vestan þar sem formaðurinn á venslafólk.

Í lokin fór ég fögrum orðum um aðbúnaðinn í kirkjunni og sér í lagi safnaðarheimilið. Þá kváðu við mikil hlátrasköll en meðal áheyrenda var einn ágætur maður sem hafði staðið í fararbroddi gegn byggingu þess á sínum tíma.

Ég mátti því hlýða á andmæli við ræðu minni þar sem færð voru rök fyrir því að aðrar leiðir hefðu verið heppilegri en sú sem farin var.

Þetta er í fyrsta skiptið mér vitanlega sem menn hafa uppi andmæli gegn aðventuhugleiðingu en allt var þetta þó á ljúfu nótunum!

url: http://skuli.annall.is/2006-12-10/12.49.31/

© skúli.annáll.is · Færslur · Ummæli